KIR AN RÊL LO Lalpa tan kan rinawm ve em? tih hi inzawt ta theuh ila, rinawmna hrim hrim pawh Bible-ah a kûr ngeinguai a, kha lam kha chu chipchiarin sawi ka tum lutuk lemlo a, a rawngbawlna kawngah hian chauh chang nite chu kan nei vek ngei ang, nimahse chûng hunah chuan huaisen taka kan kan thlan tur diktak kan thlan thiam a tul thin a ni.. Kan beisei van kanaan ram chu rinnain kan thlirna zawnah kan dingnghet em? Nge, kan HAWIKIR LEH THIN? inzawt leh ta ila, Pu T. Romama hla phuah chuan," Ringtu hawikirte hmuh châng ni hianin, Chu ram chu ngaih a zual leh thin e; hawikirte hmêl awm tawhlohna ram chu, Thlarau khawvel a nî, a êng reng e," a ti a. Amah Pu T. Romama ngei pawh hian hawikir thin te avang hian vanram chu a ngai vawng vawng hial zawk zu nia. Chu hmunah chuan phatsantu an awmtawh dawn tlatlo a tinni. Thuthlung hlui lam kan en chuan Israel fate Aigupta ram atangin a hruai chhuaka kawng lakah an hel tlata an borala, ramtiam kanaan thleng phalo hnung tawlh a, Pathian thu awih duhlo tam tak kan hmu a, Numbers 16:32-33-ah khan thu awihlo hremna alo langa, Kora te, Dathana leh Abirama te chhungkua chu thawklehkhatah lei chuan a kâ a ânga, a lo khichat a seol-ah chuan an liam thla ta duak a, mi 250- lai an ni a, a rapthlak hle. Number:1-chhoah khan chhiarpui(census) hmasa neih a ni a, Levia chite tello paw'n nuairuk an ni a, Pathian thu an awih leh tak loh avangin thlalerah a tiboral ta a, chhiarpui vawihnihna an neih leh chuan, chhiarpui hmasa a mi kum 20-chin chu tumah an awm tawhlo a, thlalerah khan nuai têl fe an thi tihna a ni a, a rapthlak hle,, Lota te chhungkua pawh vantirhkoh in," I nunna turin tlân chhuak rawh! I hnunglam hawi suh la,"(Gen 19:17) an ti a, a nupui chu hnun lamah a HAWI KÎR a chi khâwnah alo chang ta a nih kha. Hei tak mai hi Thuthlung Thar lamah ISUA'N," Lota nupui hre reng rawh u," (Lk 17:32) a lo ti ve leh bawk a ni.. Ka sawi tum tak phawk chhuak turin khitiang khi sawi a tula ka'n ti ta duah a nia.. Thuthlung hlui lama mi ropui tak takte, rinawm leh fel taka awm hote kha hetah Hebrai ziakah rinna kawnga mi fak hlawhte zingah an tel ta hlawm a, harsatna tam tak karah rinna in ke an pêna, " Thil tiamte chu chang lovin; nimahsela, chûng chu hla tak atanga hmuin chibai an lo bûk tawh tawh a, leiah mikhual leh khualzin mai an ni tih an inhriattir tawh bawk a,"(Heb 11:13) . He lai thu hi a ropui ka tiin ka sawi ning thei mawlhlo a ni.. A sawi zela," An chhuahna ram chu lungkham sela chu hâwnna remchâng an hmu tawh ngei tur a ni," a ti a ni. Duh nise khawvela HAWIKIR lehna chance an ngah ve khawp ang le, mahse, hla tak atangin Chibai anlo bûk tawh tlat a, an van fakawm ngai em! Hliam tinreng tuarin khandaiha sah hlumte chu anlo tuara Rome sawrkar ropui leh chak tak alo ding chhoa, khâng zawng zawng kha anlo tuar a, a hnu zel kum A.D tam tak thlengin Kristiante tih duhdahna rapthlak tuarin kan mi hmasate khan anlo tuar chhuak tawh a, hla tak atangin ramtiam an hmu fiah tlat a tinni.. Ringtu tak tak tan hian 'khawvel hi awmna tlak a nilo' a lo ti hial mai. Keini pawh a hnung kan zuina kawngah hian hnungtawlha hawikir lehna chance tha kan nei nitin zantina, Kan piang chhuak hlawl kan awm mai mai hi hremhmun fa kan ni a, Degree pêk ngailo in Hremhmun lut turin kan fit sa tlap a, tum pawh a ngailo, chutiang ang deuh chuan a hnungzuiin thui tak ke pen mah ila, thlemtu a thawk na ve leh hlauha, Pathian fa pawh ni tawh mah ila, Hawikirlehna chance hi a tam em em mai si a.. Chutiang a awmtura beih kan ni rêng a, chu tak chu a ni. Kan tum Vanram hi kan chianglo fo thin niin alang, mi fakhlawhte'n hla taka atanga chibai bûka an thlir ang kha kan hriat renga beiseina nen ka thlir tlat a ngai a ni.. "Leia thil awmahte in rilru nghat lovin," a tih ang khan,, Heng thu hi hla phuah thiam Pu F.C Thanzâwna khan," Dam lai khawvêlah hian lungawina kim rêng ka hm lo va," tia a bul rawn tanin "Krista hmangaihtuten lungawina leh muanna chu an chang, Rinnain an kal zêl, ramte an la KÎR AN RÊL LO; Kei pawh rinna dinga râl do thei turin, Thlarauvin min hruai zel ang che," tiin alo au chhuahpui ve a ni. KÎR an tumlo a thihchilh hmiah ngam zawk a, chu tak chu a van ropui leh zel em! Kîr hmang, phatsan leh thin kan ni em? A tawp khar dawn ila, hla siamtu vêkin," Min ngai lovin an lêng ramthianghlimah, KÎR AN RÊL LO an kal zel e, Lei hi hnuchhawn ram a lo ni," a ti a, khing kan sawi takte nen khian a inmil fu mai, khâng kan mihuai kalta te pawh khan, khawvel hrehawm tak an kalsan ta kha an inchhirlo viau ang, Lei nun rêng an ngai tawhlo Beramno hmaah chanvo ropui tak nen tual an lêng tawh a, natna leh hrehawmna leh sual avanga rumna rêng a awm tawh lo a ni.. Thihna te ngei pawh chu a thi ve tawh dawn si a. A va nuam dawn em!