khawvelah hian chhuantur ka nei ve lo a, sum leh pai chhuantur ka nei hek lo. Hman deuha ka sawi thawi ang deuh khan, ka vawk chaw chhumna In ah chuan ka nei ve a, chu pawh ka bêl neih dang aiin a lian a, a chhuanawm ve deuh a, a langsar tham ve deuh hlek a ni. A lansarh chhan pawh a rawng a dum bîk vang mai a nia, chu chauh chu a ni, chhuantur langsar tham deuh hlek ka neih ve chu. :-D
A chang hi chuan beidawnna tuilianin min vur hlup hlup a, rinhlelhna chhumpui chuan min kiansan hek lo, lungngaihna ruahpui chuan ka dârahte, ka lûah te min dêng ve fo thin, "Mihring remruatna chuan sa remruatna pawh a tluklo," tiin Bible in a lo sawi a, a dik khawp mai, a dik i tih ve ngei pawh ka ring. Nie, beiseina sáng tak nen planning han ruahman thin mah ila, kan thu lohzia chu a lo langa hlawhchhamna chuan mihringte min umzui awn awna, a tihngaihna aváng hle Bible in khuarel thuhmun mihring chunga thleng a sawi hi zawng a dik ngang mai, chu thil chu hman thiam a ngaia hringnun tawlailir khalh ngil ngai an tih thin tak hi niin ka hria, Bible kan en chuan Israel lal fing tak mai Solomona'n thliar hran a tum vea mahse a thei lo, "In tlansiakna hmunah michak an hlawhtling chuang lo va, Indona hmunah mihuai an hlawhtling chuang hek lo, mi fingin ei tur a hmu bîk lo," tiin makti fahranin alo sawi ve bawka.
Thil ropui tak tak khawvela awmte hi ka ngaihtuaha, Solomona bawkin a sawia 'Lalpa chuan heng zawng zawng hi finna hmanga a siam vek a ni,' a ti mai, a ropui khawp mai, chu hmunah chuan ka chanvo ka thlira ka hmu lo a, a then chuan khawvelah hian chhuantur an ngah hlea, in leh lo ropui tak tak nen car changkang tak tak an nei a, an lei tasa chu lei hnuaiah tawihral mahse an thlân lung leh an chanvo leia awmte chu chhuan tham a tling tho tho mai, tiin ka thlir ve fo thin. Khawvelah hian chhuan tur chu ka nei lo a, ka neilo takzet a ni. A diklohna sawi tur lah ka hre chuang hek lo. Hetia mi tlaktlailo ber leh rethei tak nia ka inhriat lai hian ka Lalpa thihna Kraws(cross) ka ena he thil hi ka hmu fiah ta a. Isua khawvelah a lenlai khan in leh lo zu nei miahloa, kei chu mut lumna in ka neia, changkangin ropui lo hle mahse, lo thi pawh ni ila ka ruang chungah min lainattutur thenrual tha ka nei a, Paula tawngkam takin, " tehkhin thamah ka ruat si lo." Amah Isua ngei pawh Isaia sawi dan takin lungngaihna hre thei leh natna hre mi kha a ni ve miau a, he thu a sawi hian a nui sáng(smile) in ka ring lemlo, "Sihalte'n kua an neia, chunglêng savate'n bu an nei, mihring fapa erawh chuan lunghahna hmun a nei lo," tiin a sawia, a lungngai ve viau ang tih a hriat, misualte kutah a thi dawn tih lah a hai der si lo.. Sihal te meuh pawh a pûkah te an chêng a, sava te ngei pawh chu thingbukah bu an nei a ni. A ni erawh chuan in lehlo pawh a neiloa, a mihring thil tak phei chuan amah anga chhuantur neilo hi kan awm kher lo vang. Thenrual tha nei mumal lovin dawta sual tinrenga hêk a ni si a. A vahvaihna Judai ram kha tawk rawh se..
Chu thil ka ngaihtuah chuan a ropui ka ti a. Ka tê vawng vawng a ni. Kan tana a inpêkna hi a van rapui em! Tin, mihring anga lo awmin inngaitlawm a, thi khawp hiala thuzawmin a lo awm ta a, krawsa thihna ngei chu. Duh nise, "inti dam lam, keini pawh min tidam ta che," an tih lai khan intidam thei a ni a, Mahse, Pa thu chu a lo zawm a, a ti famkim ta si a.
CHHUANTUR AWMCHHUN CHU:- Pu R.L Kâmlala hla phuah angin," Ranthlêng leh thing ânchhe dawng leh Vana lallukhawm a inzawm," chu thil chu a ni ropui chu. He hla phuahtu thlaraua khat hian a hmu thuiin a sawi chhuak thiam khawp mai,, nun kan neih theihnana a lo kal vawikhatna (first coming- Ranthlêng) leh Krawsa misual boral mai tur thiam kan channa leh Jerusalem thara Lallukhum mawi tak chang thei tura min dahna hi a ni chhuan tham awm chu. Kraws thu chu khawvel mite tan âtna a nih miau avangin mi neinung leh khawvela miropui leh mifing ber berte neih loh leh hriatthiam phakloh a ni tlat a ni.. A tlawm em a ni e. He lai Chanchin Tha thu hi thuhriltu ropui DL Moody-a khan ropui a ti tawp thei lo a,"Ka thil hriat zawng zawngah chanchin tha hi a th bera, chuvangin, thil ka sawi dawn a nih chuan,'Chanchin Tha,' hi ka sawi tam ber tur a ni," tiin a lo sawi ve bawk a.
Paula chuan,"Kei erawh chuan kan Lalpa Isua Krista kraws lo chu ka chhuan loh tûrzia mai chu, chumi zârah chuan khawvêl hi ka tan khen behin a awm ta, kei pawh khawvêl tan khen behin ka awm ta a ni," a ti a. A van ropui ngai em! Chu Kraws chu a ni ka chhuantur awm chhun chu.
Chaklo chung chung pawha a hnungzui hi leiah pawh a nuam a ni a, Vanah phei chuan engtiang tak ni ang maw..
"Chatuan famkimna hmun thlen hunin, A va ropui dâwn Krista zârah! Riangvai, chahai hehtu lian chan, Vohbîk, chawimawina lallukhum Changa kei ka ding ve tur chu."
