A VAN ROPUI TAK EM!

Thu leh hla thiam tak tak ten siamtu ropui zia an lo ziak kûr dup a, Sap hla ropui ka tih ém ém,"The flowers the sunset the trees," tih hla Jim reevesa'n a rawn sa luah luah mai a, a aw nalh mai piahlamah a thu ropui tak mai chu mi khûk lai a khu ve loin ka'n phûl hluaia, ka'n tui tlaikhawhnu ve leh a. He hla phuahtu hian a phuah ropui ka ti thin Rose kuhmum mawi tak mai leh rimtui ém ém mai te chu lei mihringte siam a ni mailo, hetiang siam tur hian mihringin finna a neilo a, Pathianin duhtaka a siam a ropuizia puannan a hman thu a rawn sawi a, Mizo thu leh hla thiamten Fartuah leh Vau an lo chham kûrdup ang deuh hian Sap ram thin hmingthang a'n rawn phawrh a, tihian a sawi zel a, Dodwood, Woak, Willow tree ten a siamtu fakin parfung an rawn chhuah a, a par velah te chuan rannung chi hrang hrang an thlawk nauh nauh a, Dogwood tree phei chu Isua khehnbeh nana hman a ni a, Krawsa a tuar lai min hriattir e a ti a(Dogwood hi Sidar kan tih nen hian thuhmun a nih hmel) thilsiam rawng chi hrang hranga chei mawite chu a thlir kual zel a, Kan Pathian chauhlo chuan tudang mahin an siam theilo,' Each page in the Bible is true," a ti hial rêng a ni. A hmuhhmaih hauhloh chu thingkung ropui leh pangpar chi hrang hrang ten siamtu an fak a, chumai a nilo, Ni tla tur a rawn êng sen no ruih mai a, a zung inthen phak maite chuan tlângpang te a rawn chhun no nghalh maite chu a hmuhhmaih lova, siamtu hi a van ropui tak em! a ti tawl mai. Tunlai chhanah chuan hmakhwsâng a ni tawh ang. Scientist ropui Lal Davida khan fiah tak leh chiang takin kan Holly Bible ah hian alo tial chhuai tawh bawk a, Asi tam chin a chhiar a; an hming a vuah theuh hlawm a(sam 147-4) Tuifinriat chhunga awmte , leihnuaia awm chite thingler a awmte chu a rawn sawi dan dan a, chu mai chu a nilo, vân lam boruak zaupui maiah chuan Arsi chhiarsen loh tam tak an awm a, heng te hi Lal Divida khan a hmu a,'ka haúin' a thlir ka ring. I vân, i kutchhuakte, Thla leh arsi i ruathote khi, ka ngaihtuah châng chuan, Mihring hi eng nge maw a niha, i hriat reng thin ni? Mihring fapa pawh hi eng enge maw a niha, i kan thin ni? Ka ti thin(sam 8:3,4)" a ti hial a nih kha. Davida chuan a hrefiah em a, 'Finnain i siam vek a ni. Leilung hi i hausaknain a khat a nih hi' a ti a. Sam 140+ kan chhiar chhoh zel chuan thilsiam chi hrang hrang tawng theilo tlângte leh thla leh arsi zawng zawngte hnenah chuan,'Lalpa chu fak rawh u' a ti mawlh mawlh mai a ni.. Philosopher ropui Joba leh a thian pathumte leh Solomonate, Davida te hian Pathian finzia leh ropuizia chu an chelhlo hle a, mak an ti zawk a ni. Pathianin Joba hnenah thawngaleivir hmanga, a biak khan zawhna khirhkhân lutuk a zawh khan tihvak ngaihna a hrelo 'ka kâ ka hup mai a ni' a ti hmiah mai a ni. Lal ropui Solomona meuh pawh ram tuktinpar pakhat tluk pawh hian cheiin a awmlo a ti hial a ni. Chunglêng sava ten buh an tuh lo a, an ât hek lo an seng bawklo Pathianin a chawm vek si te hi! A ropui mange. Pathian remruat leh a thiltih a hmuh khan Davida chuan,'A sâng êm a ka phak lo a ni,' a ti leh tawl mai a ni.. Siamtu hi a van ropui tak em! Ka'n zeptel leh duh hram chu a thilsiam zinga mak dangdai tak pakhat chu Leviathan hi a ni Joba 41-ah chipchiar takin a rawn sawi a, a chungah kutthlak tum teh i beihdan tur ngaihtuah rawh i ti leh tawh ngai lovang! a ti leh hmiaha, thîrte chu buhpâwl ang lek ah a ngai a, a mitte chu khawfîngchat ang rû mai a ni. A rapthla fu ang. Davida chuan," sawtah sawn Lawnpuite a kal saw, sawtah sawn Leviathan a awm, a chhunga inkhêl tura i siam chu," a ti a. Zawlnei Isaia chuan Dragon ang mai a nih thu a sawi a. Scientist te hian anla prove hauhlo, kan Bible ah hian an la prove loh sawitur tam tak a awm, Vision nei pakhat chuan Leviathan hi a hmu a, khawvel tawp dawna rawn la chhuak tur niin a sawi a, tribulation hunah te chuan ala rawn chhuak mahna.. Geologist- ten leilung leh a chhunga thil an zir a, Pathian ropuizia an hmuchhuak zel a, chutiang bawkin, Archeologist/Historian ten thil hlui chanchin an chhuinaah Siamtu thilduan ropui tak hi an la hriat belh zel a ni. Lalpa thingte chu a tlai thin, Lebanon tlanga sidar thing a phunate chu. Chutah chuan savaten bu an chhep thin. Vacha erawh chu fâr thingte chu a in a ni. Tlângsangte chu Sathâr tân a ni a, Lungpuite chu zazupui tan inhumhimna a ni(Sam 104:16-18) he lai thu te hi a van ropui tak em! Sathârte hi khâmpânga khawsa tura din an ni bawk a, "khâmah an zuangthla a, pûkah an in binlût zak zak thei e," an tih chu! Thingzung thlâr phena zûva chettlatna hmuh chang te hian Siamtu ropuizia ka hre chhuak thin. Rome 8:28 ah chuan thilsiam zawng zawngte Vanramah an luh tur thu kan hmu a, a ropui ber Mihringte hi kan lût kim ve ang em? tih hi ngaituah mai mai ta ila. "Lêntupui leh tukram phûllên fan chângin,Sîrva zaimawiten sâng thingtin awi e, Khua chuan ila tlângsâng tinreng atangin, damte'n luange, lui leh thlifim nuam te".. PATHIAN HI A VAN ROPUI TAK EM!