I HRIAT RENG THIN NI

'Kawngpui a that poh leh accident a tam' tiin an sawi thina, han ngaihtuah vang vang pawh hian a dik viau a ni. Chutah chiah chuan fimkhurna kan tlachhama hotê-ah boralna a thleng thin. Thil zau deuh huau mai leh a hamthatna hmuh tuma kan phêt buai chhenna te pawh hi thlarau nun hian a mil vak lo. A mil loh mai bakah boralna a thlen châwk. Chumai a ni lo, a aia pawimawh zawk boralna tak tak a lehpek pawh awm tawh chuang lo chatuan boralna thlarau(soul/spirit) hremna a thlen thei tih hi a chiang viau a ni. Hengte avang hian a ni ang, Bible chuan, "Mi ngaiha kawng dik ni awm taka lang, a tawp chu thihna(boralna) kawng ni si a awm" (Thuf 14:12) a ti a. Han chîk vang vang hian sual hnathawh hi thil chhe lam sual langsar deuh hi a ni ngawt lo va, buh tak zinga a tak ang tak a lem ni si a lo awm ve thin ang hi a ni. Kan Lalpa Isua ngei pawh thlalerah ni 40-leh zan 40-thlema a awm khan, thil chhe hmangin a thlem tlat lo dân thu leh zawlnei te thu awmsa hmang khan a thlema. Biakin chhip zum atangin Pathian Fapa i nih chuan tla thla rawh, "I chungthu-ah zawng a vantirhkohte chu thu a pe ang a, An kutin an dâwm ang chia; Chuti lo chuan, i kein lung i chuih hlauh dah ang e"(Mt 4:5) Mosia tawngtaina thu hmangin a thlem a ni. Han ngaihtuah zui leh ta ila, tla pawh ni se; Pathian Fapa meuh a nia, a tla silawngin a rinawm loh a ni. Mahse, a thu hnuaiah chuan a kun duh chuang lo. A van ropui em! A zau zawkin han han ngaihtuah leh ta ila, khawvel hian a thlen tur(target) a hnaih tual tual tih hi hnialthlak a har viauin ka ring. Isua hnung kan zuia, harsa tih chang kan nei vek anga chungah pawh chuan tiamchin lam kan pan talh talha, van khu leh tui nihna chanvo neiin kan tana hmun min siam sak chu chang turin ke kan pên a ni a. Chu lo liama nuam a awm loh vei nen, chutah chuan mi rethei chhuanchham pachhiate pawhin,"Khawvel hausakna ropuina leh chawimawina neilo mah i la, HAUSA ka lo ni Krista zarah, chatuan hmun in nuam leh ropui chu ka tana buatsaih a lo ni, Halleluiah ka hausakna chu Lalpaah a ni," tiin he hla hi tui ti takin an sa tho tho. Chubak chanvo ropui chu a awm dawn chuang em ni? Ka sawi tum(point) tak chu hei hi a ni. Modernism hian min eichhe mek ti ta ila, rilru nâ kan awm vakin ka ring lo. Hmani deuh September thlaa VanaPa hall-a function ropui ve tak praise and worship deuh taka an hman kha chîk deuh takin ka lo en ve a, an speaker pawh hnam dang mi a nia, khang a thusawite kha a ropui khawp mai. Chutihrual chuan rinna tak taka Pathian rina beisei chuan khawvelah sum leh pai lamah nuamsain an awm ang tih ang zawnga a hlawkna(prosperity gospel) têl lam kha a vaw liana, vawilehkhata nu pakhatin rangkachak a peka nuamsa taka an lo awm thu te kha a sawi a. A chunga kan sawi nen chuan a inpersan viau mai. Mizo zingah chuan hetiang lam sermon leh ziak hi a awmlo fu thung. a lawmawm satliah a niloa a ropui ka ti lo thei lo. Hetiang rawngbawlna nei hi tunlaina hri a ni tlat maia. Kawng dik niawm taka lang a tawpa kan boralna tur a nih theih a rinawm. Mipui tam zawk chuan an bwr hut huta sap ram kohhran tlu chhe mek an sawi atang pawh khuan a hriat viau a ni. Joel Osteen-a te meuh pawh an bâng bik lo, zawhna an zawh pawhin, a thungrulhna lam leh tlema a harsa lai leh khauh lai chu sawi enah pawh ka ngailo,'tiin a sawi niawm a ni a. Heng thu sap ram kal dan phung tih vel hi C.K.T.P conference 2014 khawzawla neihah khan Dr. Ramdinthara Sailo khan Evangelical takin a rawn hlap ve hial a nih kha. Ringtu kan nia, sum leh pai han neih ve chu kan duh alawm. Heng zirtirna modernism te hi thlang hlauhawm tak mai a ni. 'Lalpa sum min ve rawh' tia tawngtaia rinna tak tak nen beiseina nen tih chuan Pathianin a pe ngei ngei a ni tih lam an vaw lar hlea, chu hamthatna chu tunge duhlo awm ang? Tak tak chu ni se, A thlanawmin AMEN han pek dap dap chu a nuam dawn em a sin. A thente chu, chu thangah chuan kan tânga, Pathianin min ensan deuh niin kan hriaa, hausak a hnekin harsatna kan chungah a thleng zawk a. Pathian meuh pawh kan rinhlelh phah hiala, a nuam chu engruai a lo ni si lo. boralna kawng lamah kan let leh ta zawk chu a nih hi! Chuchuan a entir chu kraws thutak thleng silo, a hrehawm lai leh nakina hremhmun tlâk a hlauhawmzia lam aia a hmangaihna ringawt buaipuia, rinawm taka a hnungzui tumna nei leh si lo, nuam deuh taka Vanram kal kan tumna ram Universalism thurin huang chhungte hi boralna kawng chu a ni tlat. A tam zawk chu kawngpui nuam zau tak lamah kan tleh dul dul tih a lang tlat a ni. Nunna kawng chu a zima a chepa a hrehawm deuh bawk a ni (Mt 7:13,14). Kawngpui zingah chuan sum ngainat na sual(Tim 6:10) te hian engzat tak hremhmun min hruaithleng ang maw. A tawp ber atan chuan a nuam lam thu dik chan ve paiha, Mosia anga reilotê atana sual nawmna himpui aia Pathian thu avanga harsatna kan hmchhawn a tul a, khawharna, tahna ruam te zawh thin mah ila, TUIHNA AWMNA TE KAN SIAM anga, chakna atangin chak leh zualna nen(Sam 84:6) Zion(Vanram) kan Pathian hmaah kan inlan dawn a ni. He hi a goal chu a ni si a.