KHAWIAH NGE I AWM TÂK??

KHAWIAH NGE I AWM TÂK??

He zawhna mak leh danglam tak mai hi zawhna awm tawhah chuan zawhna upa tak te pawh ti ila kan sawisual âwm lo ve.. Sual avangin khawvel chu buaina leh hrehawmna ten a tuam a, Evi leh Adama bawhchhiatna avangin ânchhia chu kan chungah a lo tla ta a ni. He zawhna inzawh ngaita hi lehlamah chuan a lungchhiat thlakin tuar a har mah zawk awm e. Pathianin he zawhna Adama hnenah, 'KHAWIAH NGE I AWM?' (Gen 3:9) tih zawhna zawh a lo ngaih tak avang chuan engkim hi a lo buai zo ta a ni.

THIHNA: Chu sualna avang chuan thihna a lo awm a. Chi thumah lo then ila. (1) taksa leh thlaruau inthenna. (2) Mihring leh Pathiana inthenna (3) hei hi chu chatuana inthenna, tah leh ha thialna hremhmun meidil kha a lo ni ta a ni.

TAKSA LEH THLARAU INTHENNA: Thihna tihbaiawm tak mai chuan mihausa leh hmeltha pawh a thliar chuang lo va, mirethei tak tak te nen ang khat in min hui rual ta vek a ni. Kan hmangaih ém ém te kan then a, an lei taksa thihna chuan a phuar vel a, eng ang pawhin tal chhuah tumin theih tawp chhuah mahse, sum leh paiin eng mah a tih theih tawh loh hu leh engmahin a chelhdin rualloh loh thihna chuan a chenchilh tlat tawh a, a hmelmawina zawng zawng pawh chu pialleiah a tawihral mai tur a nitlat a ni. Ui ém ém in tap chungin ruangbulah chuan zawhna mak tak tak zawt mahse chhangtu a awm tawh lo,"KHAWIAH NGE I AWM TÂK?? tiin kan inzawh phah ta a. A van rapthlak em! He thil bawk hi a ni Joba khan mak ti takin," A ni, Mihring chu a thi a, a thlarau a thlah a, KHAWNGE A AWM TAK?(Joba 14:10) a lo ti ve bawk a nih kha.

Chumai a la ni lo nu hmasa ber Evi khan a fapa ruang chungah lungchhe takin he zawhna hi a lo zawt ve ngei ang. Aigupta ram ropui tak maiah khan fa upa thah an ni a, khawvel chhandamtu ISUA KRISTA a rawn pian khan nausen kum hnih hnuai lam chu râwt chimih an ni a, he zawhna hi an zawt ngei ang le.. "Sual man chu thihna a ni si a," tih chu chiang takin an hre ngei ang. He zawhna hian tawp in tai a nei lo a, kan la inzawt ta reng a ni.

MIHRING LEH PATHIANA INTHENNA: Sual avanga bawchhiatna avangin amahah chuan thi kan lo ni ta a, Eden huan ngei pawh mei khandaih vir tawn zawk zawk a vên a lo ni ta a, Sualna chuan mitin te min ei chhe ta vek a ni. He thil hi hrechiang takin Lal Davida chuan,"A nilo lamah an pêng ta vek a, bawlhhlawh takin an lo awm ta hlawm a, Tu mah thil tha ti rêng an awm lo, pakhat tê mah an awm lo (Sam 14:3) Paula'n a lo sawi leh a,'An hrawk chu thlan inhawng a ni a, An leiin bumna thu an sawi a. An kam chhûngah rûl tûr a awm a (Rome 3: 13) tiin a lo sawi ve leh bawk a, kan sual zawng zawng chu theihnghilh mai lo vin. A fapa mal neihchhun chu khawvelah a rawn tir a, kan sualte angin min thungrul lova, a khawngaihna avangin chhandam kan nihtheih nan kraws ah kan sual a rawn phur ta . A van ropui em!

Chu tihsual erawh chuan Isua hrelo chhandamloh la tam lutuk erawh chuan ngaihtuahna chu a ti buai ta deuh. A inpekna ropui zia hi hre vek ila avan lawmawm dawn em!

Keini pawh a hnung zui peihlo tak tak kan ni. Hun tha kan neih lai hian Kan Pathian chuan zawhna mak leh ropui tak mai," KHAWIAH NGE I AWM TÂK?? tiin min la zawt reng a ni. Sualna khur puia kan awm lai pawn a ni chuan he zawhna hmang hian min sawm reng a ni.. He zawhna hi engtinnge kan chhan ve dawn le?? A hnenah hun tha kan neih lai hian i kir ang u.


"Sual man chu thihna a ni si a: Pathian thilthlawnpêk erawh chu, kan Lalpa Isua Krista zarah chuan chatuan nunna a ni.(Rom 6:23)
KHAWIAH NGE I AWM TÂK LE??